كنت بكتب شعر عاميه من أيام الجامعه
كنت بكتب فى حالتين بس غالبا
لما بفرح قوى .. ولما بزعل قوى
ومن فتره كبيره جدا مكتبتش شىء متكامل
ولا حتى خواطر
جايز لانشغالى بعملى كصحفى
وده محتاج عقل احترافى شويه ..
مش رومانسيه وذاتيه
وجايز لانى كنت طول الفتره دى عايش ..ومش عايش
أيووووووووه .. زى عمر دياب كده بالظبط
برافو عليك
طول الفتره دى كنت عايش فى النص
حياه عاديه .. لافيها جرح قوى ولا حتى فرح قوى
تقدر تقول نفس الاجابه المايعه بتاعة السؤال المايع !!
لما حد يقولك .. مبسوط؟
ترد وتقوله .. يعنى !!
أهى يعنى دى بقه .. إجابه تدفنك فى عز حياتك وشبابك
إذا كنت فى سنك ده بتقول .. يعنى ..
اللى ملهاش طعم ولا ريحه
أمال هتقول .. جدا جدا .. إمتى؟
ماعلينا .. وما تحت رجلينا
المهم يعنى ..
على كافتريا فى شارع اسماعيل باشا سرى
فى منطقة المنيرة فى وسط البلد
كنت مستنى الأستاذ محمد طرابيه
الصحفى ومعد برنامج 90 دقيقه على قناة المحور
والقعدة طولت
فتحت اللاب توب .. وطلعت كلمتين
بيتولدوا جوايا من ييجى 4 شهور تقريبا!!
عارف إن مدة الحمل طولت ههههههههههههه
بس المهم أنى ولدت خلاص !!
عقبال عندك يا أم فارووووووق
ههههههههههههههههه
هم يبكى .. وهم يبكى برضه!!
----------------
للذكرى والتاريخ .. وأكل البطيخ على كوكب المريخ
بسجل الكلمتين الهلس دول هنا..
من باب الفضفضه
خد عندك بقه يا معلم
--------------------
فرمان !!
......
ساعة الفراق ...
الكدب يصبح سنه وفرض !
كل الموازين تتلخبط ..
والطول بيحلف ألف يمين .. إنه بقى عرض !
الحلو .. يوصفوا فى مرارته !
وقمر السما .. شايفينه عالى
يقولوا.. ساكن الأرض !
...............
قولى كمان .. وكمان قولى
إكدبى .. وييجوا يحكولى
إكشفى وشك ليا ..
وإستنى الرد .
.................
وليه أرد ؟!!
كفايه تخسرى دفا عمرى
وتعيشى باقى سنينك.. برد !
حضنك حلال ..
لكن ما عاد يحلا ف عينى.
هجرك حرام ..
وهحلله.. لو على عينى .
وعدك كلام.
عهدك كلام.
قسمك كلام.
وكلامى .. شرفه من دينى !
لاكلام.
لا ملام .
لاعتب.
غدرك على عمرى إنكتب.
واللى كتب .. حفره "بإيدى" على جبينى.
إسمك أمان....
حضنك أمان.
همسك أمان.
ضحكك أمان.
دلوقتى لما بأعيد كلامى بيسكنه ... كان!
ولسانى بيتهته إسمك !
يحذف حروفك من لغته !
وبالباقى يكتب فرمانه :-
كفرت بالحب وبيكى ..
.. ومعادش ينفع تهدينى !
.. ومعادش ينفع تهدينى !
------------------------
من أشعار .. هيثم الغيتاوى
27يناير 2009
كافتريا شارع .. إسماعيل باشا سرى
المنيره .. وسط البلد
2 تعليقات البشر:
صعب قوي يا هيثم بجد
صعب تأمن بلحب ونكفر بيه
صعب نفس الحضن اللي دافنا نرميه احنا في عز البرد
صعب
صعب
لكن للاسف
بيحصل
كلماتك حزينة قاسية
فعلا كفر باسمي معني في الوجود
لوثناه بأفعالنا
ونسبناها ليه
اتمني لك التوفيق في قراراتك
كلها
تحياتي
هيثم انا طبعا بيصعب عليه ان اى قصه حب تنتهى بالفراق و مؤمنه ان الفراق بيجي لما يكون الطرفين جربو كلالحلول
بجد مش عارفه اقلك ايه
يعنى سعات كنت بتحكيلى عن الحب ده و كنت حاسه انت اد ايه مبسوط بالحدةته دى و الشعور ده
ربنا معاك
اما عن القصيده فتلاقائيه جدا و عجبنى اوى الجزء اللي بتتكلم فيه عن اسمها بجد احلى جزء
إرسال تعليق