كل حب وإنت .. قادر تحب!! قلب جديد حلم جديد فى دنيا جديده

من سنتين تقريبا .. عملت مونتاج من فيلم غاوى حب
وكتبت فى مقدمته ونهايته كلمتين
النهاردة وبعد سنتين .. قريتهم تانى صدفه
وبسأل نفسى تانى .. نفس السؤال؟
---------

ملحوظة :- لو هتشغلو الفيديو ..

وقفوا الأغنيه اللى شغاله أوتوماتيك على خلفية المدونه

اللى فى الركن اليمين تحت إسم المدونة مباشرة
---------
من سنتين تقريبا
مريت بتجربه هزتنى قوى من جوايا
أثبتتلى وقتها إنى مهما عرفت ناس
ومريت بتجارب وعملت فيها " المفتش كرومبو"
ههههههههههه
هيفضل عندى قصور فى تقييم الناس
ومعرفة تركيبتهم الحقيقيه
قبل المرور على " الديسك" بلغة الصحافة
---------
فى الوقت ده كنت تقريبا ببلور قرار مصيرى بالنسبه ليا
قرار بالإعتزال

بيتكرر تانى اليومين دول
!!!!!
لأنى ممكن أستحمل إن يكون ليا
صديق أو زميل أو أخ أو حتى حبيب بيغلط مليون غلطه
و فيه عيوب الدنيا والآخره
لإنى ببساطه مش ملاك انا كمان
لكن اللى مقدرش فعلا أستحمله ويكرهنى فى أقرب قريب
إنه يكون .. مكابر
ودى ملهاش دعوه بالتكبر طبعا
أنا بقصد المكابره فى الغلط
والعند لمجرد العند
وعدم الإعتراف بالخطأ

بالاضافه لشوية تحابيش من الكدب الفاجر

مش اى كدب .. لا فااااااااجر وعينى عينك
الناس المريضه ..اللى بتفتكر إن كلمة ..آسف
بتعبر عن ضعف او انكسار
وبالتالى بيفضلو يكابرو ويجادلو يمين وشمال
لانهم فاكرين انهم لما يقولو اسفين غلطنا
يبقى الطرف التانى كسبان
مع ان احتمال الطرفين يكونو غلطو سوا ولازم يتأسفو لبعض سوا

الأسف هو السيف اللى بنغلب بيه شيطان نفسنا
الأسف هو اللى بيثبتلنا اننا قادرين نتحكم فى نفسنا
مش العكس
-----------
وأنا صغير لحد ثانويه عامه كده
كانت اغلب مشاكلى فى البيت
بسبب مكابرتى واصرارى على انى مقولش اسف ابدا
كنت اصالح ماما بطرق غريبه
ومضحكه موت ههههههه فاكرها لحد دلوقتى
بشرط مقولش كلمة انا اسف .. صريحه وش كده
كنت ساذج وعبيط يعنى
جايز لانى كنت وحيد اهلى ومتدلع حبتين
ولما دخلت الجامعه وعشت مع تركيبات مختلفه
وقريت كتب وجرايد ضد بعضها كتير
اتعلمت يعنى ايه انك تختلف مع ناس ومواقف وانتماءات
بس تعيش معاها !!
بقيت - وانا المسلم - مصاحب اعز اصدقائى مسيحيين فى جامعة اسيوط
ولما كنت ميال للناصريه ايام الجامعه وصبحت ليبرالى الى حد ما دلوقتى
فضلو اعز اصحاب عمرى لحد النهاردة .. اخوان مسلمين!!
!!
جايز ميكونش لده علاقه ... بالأسف والمكابره
لكن انا شايف ان علاقتهم مترابطه جدا
انك متجادلش لمجرد الجدال
وان اعترافك بفهم خطأ او تصرف صادر عنك
عمره ما كان ضعف منك
بالعكس
انت اقوى من اللى قدامك
لانك غلبت شيطان نفسك
شيطان المكابره اللى ساكن اى حد فينا
بس مين يقدر يغلبه
----------
كانت مكابرتها .. سبب قرار اعتزالى قبل كده
وفى نفس التوقيت دخلت السينما وسمعت فيلم غاوى حب
وعلق معايا المشهد ده والغنوة دى بالذات
وعملت مونتاج للفيديو ده
وكتبت السؤال اللى فى أول الفيديو
........
والنهاردة تانى بتتكرر نفس القصه

........
ولما كتبت اسمى على جوجل فى ساعة فضا
لقيت الفيديو اللى كنت منتجته من سنتين
ضمن نتايج البحث على الانترنت
يابوووووووووووووووووى .. انت لسه عايش؟
سمعته تانى
وافتكرت نفس السؤال!
هل أقدر أسامح فعلا؟
بس مش كل البنات بتعمل زى حلا شيحه
فى نهاية الفيديو
هههههههه
لو بغباؤهم فهمو إن الكلمة الصغنونه اللى قالتها دى
هى مفتاح أى خلاف وزعل
كان بقى عندنا ملايين الشيحات ههههه
ماعلينا

-----
ولأن مفيش حلا شيحه
يبقى طبيعى السؤال نفسه يبقى مش فى مكانه
لأن مفيش حد يستاهله حتى
هتقولولى .. يبقى انت لسه مقتنع بالشق الاول بس
من السؤال .. مع انك انت اللى كتبت الاتنين بنفسك
هقولكم انا مش هكابر
وهقول فعلا انا غلطان يمكن
بس احيانا الغلط اللى حصل بيبقى اكبر من قدرتنا على التسامح
لكن فى كل الاحوال
بتبقى .. المحاوله
مجرد محاوله اننا نقدر نرجع بنفوسنا زى ماكانت
مع ان الطبيعى ان تجاربنا بتأثر فينا
لكن حسب دماغ الفيلسوفه الصغيره " وهى عارفه نفسها اكيد"
بتقول ان المفروض تجاربنا تأثر فى حالتنا النفسيه مؤقتا آه
لكن مش صح اننا نسيبها لحد ما تغير الطباع الكويسه فينا
وتدمر قدرتنا على التسامح والحب
حالتك النفسيه هتتعدل وتبوظ وتتعدل وتبوظ
لكن طباعك الكويسه - ان وجدت يعنى ههههههه - خليها محفوظة
لانك لو جيت تبدأ بدايه جديدة مع حد جديد
مش ذنبه بقه انك تعامله بطباع ملعوب فيها
سكند هاند يعنى
طباع مهزوزة بتأثير تجربه فاشله مع ناس أفشل
--------
ماعلينا تانى ...

الأهم من سؤال .. مين الغلطان؟
إننا نسأل نفسنا .. مين يقدر يسامح؟

هل هقدر بعد كل الوجع ده ؟
أعتقد لا

واعتقد كمان ...

طول مفيش حلا شيحه وتصرفها
طول ما السماح هيفضل محدش يستاهله!